【Emily】「零技巧」攝影展 誌長者勞工日常

【明報專訊】一張相，低炒、低像素，零攝影技巧可言——如果平時行相展見到，唔少人可能會揼心口轉身離場。近排由社區組織協會聯同理大研究團隊舉辦嘅「勤工儉活——基層長者勞工生活誌」展覽，展出嘅全部都係呢啲相。原來，呢批相係嚟自超過30名基層長者自拍工作同生活日常。

清潔工垃圾房食飯拉筋

31個長者用咗12個星期，每星期按飲食、居住情况、工作環境等唔同主題自拍。65歲嘅陳美英張張相都著住藍色制服，有張甚至打大赤腳喺碌碌櫈上面瞓覺。之前佢日做12個鐘頭保安，近排因為捱夜班，搞到胃同肝有事。另一個參與嘅係61歲何妙花，其中一張作品影佢著住熒光衫喺垃圾房門口拉筋，正職係清潔工嘅佢，唔單止拉筋，有時連食飯都要喺垃圾房。

社協話，展覽目的係用長者第一身視角，帶領觀眾進入年長勞工嘅生活，從而揭示香港人口老化問題，例如職業勞損、欠缺勞工福利、退休保障等。展覽分兩個階段，噚日係首階段嘅第一日，會喺將軍澳廣場展出至下星期二（8日）；第二階段係本月18至21日喺理大舉行。