【Emily】月尾創科嘉年華 試試AI防騙裝置

【明報專訊】「創新科技嘉年華2024」10月26日至11月3日喺科學園舉行，市民可以免費入場。今年嘉年華以「科技引路，創新啟航」為主題，除咗可以睇到75間本地大學、研發中心同政府部門嘅創新發明同科研成果，仲可以參加約150場涵蓋人工智能、節約能源等唔同主題嘅創科工作坊、網上講座同互動遊戲。

噚日傳媒預覽展出迦密主恩中學研發嘅長者防騙裝置，配備語音識別，透過人工智能同大數據技術，尋找信息中可疑字眼，發出圖像警報，減少電話騙案。嘉年華將展出第二屆「城市創科大挑戰」部分得獎方案嘅原型畀參觀者試用，包括支援照顧者嘅方案，以及提升郊野公園同露營地點營運管理及遠足者大自然體驗嘅方案。

創新科技署長李國彬噚日出席預覽話，𠵱個嘉年華係推動科普嘅年度旗艦項目，希望藉此加強市民對創科嘅關注，培養後生仔對創科嘅興趣。