【Emily】1億國慶金多寶 3.5注中獎金3097萬

【明報專訊】馬會今年為咗慶祝國慶75周年，首次設立國慶金多寶，仲破天荒分兩輪舉行，每輪頭獎彩金高達7500萬元。上個禮拜三（2日）嘅第一輪攪珠無人中頭獎，噚晚第二輪攪珠頭獎基金被推高到1億元，萬眾期待。噚晚攪珠結果係10、16、24、32、37、40，特別號碼係19，頭獎有3.5注中，每注派彩3097萬元，二獎同三獎就分別有34.5注同592.5注中，每注分別派彩約27.4萬元同4.3萬元。

總投注額2.7億 多上輪近六成

由於第一輪國慶金多寶無人中頭獎，累積多寶連同金多寶金額嘅總額8000萬元撥入噚晚嘅第二輪國慶金多寶攪珠。噚晚攪珠總投注額2.698億元，比第一輪嘅1.687億元多咗近六成。

頭獎彩金去到1億元真係好吸引，但Emily睇番資料，原來上個月17號攪珠嘅中秋金多寶，吸引到1.84億元總投注額，結果頭獎1.5注中，每注派成5037萬元，比起噚日嘅頭獎仲多1940萬。不過咁講，呢期多咗幸運兒中頭獎，對中獎者嚟講都係皆大歡喜嘅！