【Emily】九巴推寵物巴士遊 35蚊陪主子遊車河

【明報專訊】身為狗奴才、貓奴才，時時刻刻都會想同「主子」黐埋一齊。由嚟緊嘅星期日（13日）起，每逢周六、周日同公眾假期，九巴會推出「寵物巴士遊」，每程35元，車費包括一個乘客及一隻寵物。寵物主人經九巴網上商店預先登記後，就可以同心愛嘅寵物「出巡」，搭巴士游走沙田、荃灣、白石角、西貢、西九文化區同馬灣。

游走沙田馬灣等地 今起可報名

「巴士遊」每半個鐘一班，路線途經多個寵物好去處，例如白石角海濱公園、沙下灘、科學園、荃灣公園、西九文化區、馬灣等，部分收益會捐畀香港愛護動物協會、香港拯救貓狗協會及大樹下善待動物庇護站。九巴話希望支持關注動物權益嘅工作，爭取寵物友善嘅社區環境。「巴士遊」今日11點起接受報名，詳情請留意九巴網頁。