【Emily】議員訪機電署困𨋢 署長有份「少少尷尬」

【明報專訊】立法會發展智慧城市事宜小組委員會多個議員，噚日到九龍灣機電工程署總部參觀時發生「尷尬」事件，議員同機電署長潘國英一齊遇上困𨋢，被困20幾分鐘，負責監管升降機操作嘅機電署長亦要等承辦商人員到場解鎖裝置，眾人先安全離開。

到訪機電署嘅議員包括小組委員會主席葛珮帆、副主席邱達根，成員陳振英、陳紹雄、簡慧敏，同埋非委員謝偉銓、梁熙、張欣宇。據知除咗梁熙，其他人與署長一齊困𨋢。

張欣宇話涉事升降機可載20人，當時只有十幾人，無超載，相信係部𨋢關門時合上位置唔協調，啟動咗安全裝置而令部𨋢停咗。佢話事件有少少「唔好彩」，相信唔涉及維修或機件故障，類似情况偶然發生，笑言只係事件發生喺機電署總部，困𨋢嘅又係署長同議員，「有少少尷尬」，當時大家喺𨋢入面都係閒聊講笑等待。

機電署話，總部昨早有一部升降機發生輕微故障，承辦商隨即派員到場檢查及重置，全部乘客安全離開。