【Emily】公民科廣東省首團 120師生遊丹霞入韶關鋼廠

【明報專訊】高中公民與社會發展科規定學生必須赴內地考察，教育局長蔡若蓮噚日喺社交平台分享，新學年嘅公民科內地考察已啟動，廣東省首發團日前出發，有120名保良局李城璧中學嘅師生到韶關考察交流。

蔡若蓮話，本年度嘅公民科內地考察行程會增至28個，其中18個係廣東省內行程，10個係4至5日廣東省外行程，新增咗3個省份，希望豐富同學嘅學習經歷。佢又感謝國家教育部、中聯辦教育科技部、各省教育廳及不同內地政府部門協助增加考察行程。

至於行程內容，蔡若蓮話，同學仔呢兩日除咗到訪世界自然遺產丹霞山，參與科普生態講座了解丹霞地貌，仲參觀咗韶關鋼鐵廠，了解現代化重工業嘅發展。佢仲提到，公民科內地考察係香港高中課程嘅重要組成部分，目的係畀所有高中學生通過體驗式學習親身了解國家，欣賞中華文化，對國家最新發展和成就有更深入嘅認識，提升國民身分認同。