【Emily】陳健波化身影評人 讚《城寨》情義精神

【明報專訊】「入得嚟城寨，你幫人、人幫你。」港產片《九龍城寨之圍城》叫好叫座，立法會議員陳健波噚日亦化身影評KOL，喺facebook上載短片分享3套佢覺得有意義嘅港產片，包括呢套大熱作品。佢話呢套電影反映1980年代香港社會動盪，展示城寨黑暗同混亂，帶出港人喺困境互相扶持、團結、有義氣嘅精神，仲話機場近日展出戲內場景，見證港人有情有義嘅事迹。

陳健波分享嘅另外兩套電影係舊年上映嘅《年少日記》同《白日之下》。佢話前者透過一宗學童輕生事件，探討香港教育制度令學生有過度壓力，同埋家庭冷暴力對小朋友嘅深遠影響，又話好多細個叛逆嘅仔女，大個變咗最孝順同生性，呼籲家長唔好偏心，要一視同仁、有商有量。

陳健波話，近年唔少港產片叫好叫座，甚至揚威海外，彰顯香港文化實力，而呢3套電影各有「功能」，有推廣香港文化、本土情懷，亦有喚醒大眾反思一直被忽略嘅問題，值得支持。佢期望政府加強支援同推廣，令電影同相關產業發展成重要產業。