【Emily】Ian符理想伴侶形象？ 羅淑佩：做得佢媽有找

【明報專訊】單身嘅房屋局常任秘書長羅淑佩係MIRROR成員陳卓賢（Ian）嘅fans，佢噚日喺電台節目被主持車淑梅問到Ian符唔符合佢理想伴侶形象時，佢嚇一嚇，「吓？我做得佢阿媽有找喎！」又話，「如果我有個咁嘅仔就唔錯啦！」至於感情生活，佢似乎睇得幾開，「呢啲天意嚟嘅」，話自己因為好多朋友，身邊有幾位閨密，生活都好充實。

羅淑佩不時會喺facebook分享自己睇演唱會嘅相，被問到介唔介意有人叫佢做「追星署長」，佢就話自己唔係追星，唔會去啲聚會，反問「點解去到呢個年紀唔可以做番啲大家都鍾意做嘅嘢？」

佢話，鍾意Ian除咗因為對方嘅音樂才華，仲因為自己當時身為運輸署長，偶然發現Ian唔會揸快車，「咁我覺得，好呀呢啲」。佢仲透露佢近排嘅新愛好，就係緊貼國家乒乓球隊近况，仲趁金牌運動員訪港嗰陣揾馬龍影咗相同握咗手，「好開心好開心！」