【Emily】港燈×長春社 環保大使「登高」遊「城西」

【明報專訊】近日秋高氣爽，適逢重陽節，港燈聯同長春社噚日邀請一班長幼環保大使，齊齊到西半山嘅魯班先師廟「登高」，參加佢哋合辦嘅「城西漫遊」生態文物徑開展儀式。

「城西漫遊」路線由西環域多利道出發，一直向堅尼地城延伸，終點係卑路乍灣公園，全長約1公里，噚日嘅開展儀式就喺路線上一個重要景點、啱啱日前獲評為法定古蹟嘅魯班先師廟舉行，仲有唔少重量級嘉賓幫手，例如漁護署助理署長陳堅峰推介古樹名木、同為西區街坊嘅立法會議員陳學鋒同陳家珮就叫大家唔好錯過即將拆卸重建嘅西環邨。

其實港燈同長春社2005年已創辦「綠遊香港」環保教育項目，先後開發咗12條生態文物徑，港燈董事總經理鄭祖瀛解釋話，隨住城市發展，西區好多珍貴地標已經消失咗，所以希望透過新路線令市民認識西區嘅歷史，例如以前收容鼠疫或天花患者嘅東華痘局，呢啲歷史真係唔講唔知。