【Emily】實惠搞優惠惹執笠疑雲 各方抽水 網民批玩大咗 宜家諷「小編先唔會扮結業」

【明報專訊】近期接連有零售店舖結業，連鎖家俬家品店「實惠」噚日凌晨喺facebook出帖，大大隻字話「多謝各位多年支持」，同時多間分店門外就貼上「最後今天」、「多謝街坊支持」大字，大批網民以為佢執笠。至噚日朝早，實惠再發帖，原來係搞優惠活動。一時間，實惠facebook留言區一片罵聲，而唔少品牌、政府機構、組織同KOL就紛紛「抽水」，同為家俬家品店嘅宜家家居仲諷刺話「小編先唔會扮結業」。

政府部門都嚟抽實惠水，警察噚日喺facebook發帖宣布，八鄉少訊中心同樂日嘅門票已經派晒，更用藍底白字模仿實惠嘅排版寫上「多謝各位多年支持」，而喺「支持」後邊加咗幾粒細字「八鄉少訊中心同樂日」。

警察fb模仿 答謝支持少訊同樂日

清潔龍「阿德」扮呻做KOL攰

食環署嘅吉祥物「清潔龍阿德」都加入抽水，佢先話自己做咗清潔界KOL咁多年都攰啦，但話鋒一轉，話只係放個小假，未來會繼續帶大家一齊清潔香港。

噚日實惠facebook有不少人留言話「玩大咗」，甚至批評係「扮執笠」，話咁嘅marketing好差，引起顧客恐慌，亦有人話「玩咁大會有反效果」，令顧客失去信心呢！