【Emily】議員試軟餐 讚咕嚕肉飯好味易食

【明報專訊】有吞嚥困難嘅人可謂「無啖好食」，好彩近年多咗「軟餐」嘅推廣，畀一班病患可以重拾食嘢嘅樂趣。一眾立法會福利事務委員會嘅議員，日前開完會參加咗社聯同大快活合辦嘅「軟餐試食暨照護食推廣業界分享會」，除咗唔同食材嘅軟餐外，仲試食咗特製嘅「咖哩雞飯」、「鮮茄豬扒飯」等。

委員林素蔚話自己曾到製作軟餐嘅機構參加工作坊，學習製作吞嚥友善嘅叉燒飯，今次佢試食「咕嚕肉飯」，話食物嘅形態同軟硬程度都調整到符合國際吞嚥困難障礙飲食標準，既照顧到營養同口味，亦方便安全進食。

管浩鳴：軟餐有質素 患者重拾樂趣

社聯行政總裁蔡海偉同大快活代表都有出席試食會。委員會主席管浩鳴話，今次亦從中了解社聯嘅「照護食」項目，覺得有質素同標準嘅軟餐可以令患者重拾食嘢嘅樂趣，同時亦減輕到照顧者負擔，希望喺人口高齡化下，各方一齊為有需要嘅人提供更好照顧同支持。