【Emily】公務員徵文比賽 古文記升旗奪冠

【明報專訊】公務員事務局今年7月至8月舉行「情繫中華」徵文比賽，係國慶活動之一，最終收到來自51個部門近300份參賽作品，包括唔同職系及已退休公務員，最終選出10篇得獎，其中冠軍同季軍得主都係來自紀律部隊。

錯過見證回歸「哭一上午」奪季軍

冠軍作品係高級消防隊長邱熠所寫嘅〈觀升旗禮記〉，提到舊年喺北京天安門廣場睇升旗禮，見到「氣象磅礴，萬眾歡騰」，因而以文言文記錄當時所思所想。季軍作品就係警長袁漢平寫嘅〈父子〉，由自己出世正值中英聯合聲明簽署之際，寫到近年嘅社會事件，提到香港回歸時佢讀小六，因半夜太眼瞓錯過見證回歸一刻，翌日「哭了整整一個上午」。佢又話回歸多年，祖國對本港管治並非如外界所講高壓，亦無白色恐怖，比英治時期更親切自由。

亞軍就由房署政務主任姚宇欣奪得，佢提到「龍脈」見證各朝代嘅興衰，奔流喺神州大地之上，生生不息。局方已上載10篇得獎作品及14篇優秀作品到網站，並喺噚日舉行頒獎禮，評審之一嘅局長楊何蓓茵話唔少作品提到公務員對國家嘅責任，令佢特別欣慰。