【Emily】廉署高層反貪劇粉墨登場

【明報專訊】多年來廉署不時以電視劇做宣傳教育，下周一（21日）起一連5日就有新一輯《廉政行動》喺無綫電視播放。廉署話多名高層會喺劇集粉墨登場，舉例首集講述樓宇管理維修貪污案中，專員胡英明就飾演行動指揮中心嘅調查人員，為飾演總調查主任嘅陳山聰送上咖啡打氣，觀眾仲會睇到首次公開嘅射擊訓練場及行動指揮中心。

首開放射擊訓練場指揮中心拍攝

廉署1970年代中推出首輯電視劇，至今已係第19輯。作為TVB今年嘅台慶劇，《廉政行動》全劇實景拍攝，除咗有機會見到錄影會面室嘅「三角枱」、廉署人員辦公室及電腦控制中心等，並首次開放廉署嘅射擊訓練場及指揮中心等場地供拍攝。指揮中心只會喺大型執法行動時運作，一般由首席調查主任率領行動，透過大屏幕掌握調查匯報及案情分析。

適逢廉署50周年，今晚播出嘅製作特輯，胡英明會喺廉署行動指揮中心同演員張曦雯及陳山聰分享反貪理念、未來路向及廉署「密密實實」嘅原因。其中胡英明提到，若執法行動「走漏風聲」，嫌疑人可能會逃脫、毁滅證據，甚至對執法人員構成風險。