【Emily】周六睇恐怖片「包場」 何敬康話銷情驚悚

【明報專訊】新民黨立法會選委界別議員何敬康話，上周六晚同太太食飯後，係港島鬧市某戲院搵咗一齣恐怖電影睇，點知入場見到嘅場面同樣驚悚，話佢哋竟然可以周六「包場」。佢話已經係周末時間，睇嘅又係具娛樂性嘅大眾類電影，銷情都咁樣，平日市况更不敢想像，形容咁嘅場面反映消費市場確實低迷，但點樣可以走出呢個困境，佢都未諗得通。

港人北上消費對市道確有影響。另一選委界別議員江玉歡話，有幾個外地朋友到香港開會及去廣州參加廣州交易會，話離港前趁仲有一個周末，佢做導遊帶朋友從廣州搭高鐵到桂林陽朔走走。江玉歡話，佢由香港去廣州南站跟朋友會合，再轉高鐵去桂林，見到唔少香港人都識得喺廣州南站轉車去其他城市。

江玉歡話，遊陽朔日夜都繽紛，日頭坐船遊灕江，晚上睇表演、做腳底按摩，夜市仲營業至凌晨兩點。佢話香港政府嘅《香港旅遊業發展藍圖2.0》就快公布，睇吓可唔可以集各方意見，做到好似陽朔旅遊咁多姿多彩。