【Emily】總商會擬下年率團訪美 林健鋒話助除對港誤解

【明報專訊】中美政治角力下，香港同美國嘅官方連繫都受到影響，要靠民間外交去幫忙。經民聯商界（第一）立法會議員林健鋒話，香港總商會正籌劃喺年底美國總統大選後，明年初率商界代表團訪美，由商界幫手「說好香港故事」，預料會去紐約、華盛頓等地方，亦想去考察創科設施，但計劃仲係未定實。林健鋒話，唔少外國朋友對香港情况有誤解，所以需要出去介紹香港狀况，佢亦有游說外國商界朋友來港參加會議及展覽，朋友嚟到後都同佢講，對香港觀感同經由媒體所知唔同。

黨友提早慶生 林冀樓股齊旺

林健鋒嘅黨友噚日提早同佢慶祝73歲生日，議辦人員安排生日蛋糕，上有「開路先鋒」字句，形容佢近年經常同商界去外地，包括一帶一路國家，幫手建立聯繫。林健鋒形容自己只係「爛頭蟀」，切蛋糕時許願話希望樓市好、股市旺、經濟向上，咁大家可日日魚翅撈飯。

經民聯黨友、立法會主席梁君彥都有同林健鋒慶生，佢話立法會大樓加建工程近尾聲，而目前分散喺對面商廈嘅議員，11月可以搬返去立法會大樓辦公。立法會已經揀咗11月23日上晝11點15分搞入伙儀式，話呢個係吉時、宜入伙。