經濟
海皇粥店推10元放題
【明報專訊】話說近期港人北上或者出國外遊成風，有本地粥舖海皇粥店喺facebook宣布下星期一至三，推出10元放題奇招活動，畀食客喺45分鐘內任食白粥、豆漿同埋油器，海皇粥店嘅小編喺放題活動文章仲提到，「香噴噴嘅白粥配埋脆卜卜嘅油條，再配埋一啖香滑豆漿！咁樣嘅早餐組合，就算係日日食都唔會厭」，仲叫人一齊去海皇粥店「大快朵頤」。
海皇粥店就話，呢次嘅放題活動只係限於灣仔莊士敦道分店，名額先到先得，而且每浪費100克嘅食物係需要罰款50元，小琴喺度呼籲咁多位想參加海皇粥店放題活動嘅讀者，千祈唔好貪心係咁嗌嘢食，因住畀人罰錢呀！
話說近期食肆不斷執笠同埋推出奇招，有燒肉舖話要推出優惠套餐抗北上潮，但最後有部分分店都要執笠，希望啲本地食肆可以捱得住啦。
