【Emily】馬騮連環死 李讚楊潤雄應變快 話即時圍堵化驗公布 「符合要求」

【明報專訊】上周公布嘅《施政報告》點名文體旅局未能如期完成《文藝創意產業發展藍圖》，連日引起外界關注特首李家超與局長楊潤雄嘅合作關係。噚日朝早李家超出席行會前，被問到香港動植物公園馬騮感染類鼻疽集體死亡一事嘅最新情况，李家超主動讚賞楊潤雄喺事件上快速應變，仲形容對方「符合我哋（政府）處理呢件事件嘅要求」。

上周點名楊未交《藍圖》

香港動植物公園爆發類鼻疽感染，截至噚晚有12隻馬騮死亡。李家超話文體旅局長第一時間圍堵，令問題無再擴散，同時採取適當監察措施，加快分析、解剖同化驗，仲第一時間公布結果，「符合我哋（政府）處理呢件事件嘅要求」。

李家超話會持續監察，確保情况受控，有任何新進展就會公布，「相信文體旅局長處理呢件事時，符合剛才我所講不同領域嘅要求」。

李家超喺《施政報告》附件點名話已指示文體旅局長「必須盡快完成這項工作（《藍圖》）」，並會親自監察進度。其後楊潤雄出席記者會，多次被追問《藍圖》工作及「多次被特首公開點名催促」，楊回應話「我又唔係太覺佢（李家超）好多次公開催促我」，承諾「緊跟行政長官嘅指示」完成工作。