【Emily】李兆基樓爬牆虎被斬 中大：髹完油會種番

【明報專訊】中大李兆基樓外牆多年嚟長滿攀援植物「爬牆虎」，但近日消失晒，引起同學同校友擔心。中大回覆Emily話，為咗詳細檢查大樓外牆，需要清除覆蓋外牆嘅攀援植物，完工後會種番。

原攀滿外牆 中大人回憶

校方：定期檢查翻新

過去爬牆虎攀滿李兆基樓外牆，由地下一直延伸至頂樓同隔離停車場，秋季仲會變成黃紅色，係不同年代中大人嘅回憶。Emily前日去中大睇過，原本綠意盎然嘅外牆得番一面白牆，花槽位置有唔少油漆漬。

有工友話大約一兩個月前開始搭棚同斬走咗爬牆虎，如果唔係就髹唔到油。

中大回覆話，會定期為校園內嘅建築物做外牆檢查同髹漆翻新，如果發現外牆有石屎空心或剝落，就會清除同修復。至於李兆基樓嘅外牆檢查同髹漆翻新工作今年夏季展開，喺修復同髹漆工程完成後，會重新種植外牆嘅攀援植物。

翻查資料，爬牆虎被視為垂直綠化嘅好幫手，種植半年已經可以長高到10米以上，可以避免建築物被太陽直接照射，達到散熱效果。