【Emily】麥兜伙中風學會 拍片教認病徵

【明報專訊】急性中風每分鐘可以令190萬個腦細胞壞死。香港中風學會早前搵麥兜幫手製作短片，教大家點樣及時識別病發，最近仲去咗瑪嘉烈醫院搞展覽，吸引九龍西醫院聯網總監兼瑪嘉烈醫院行政總監羅振邦等一眾醫護同麥兜、校長模型打卡，齊齊推廣中風認知。

「如果有人口齒不清……呀呀呀，講嘢𦧲𦧲𦧲脷，或者笑起上嚟……哈哈哈哈，兩邊面……唔對稱，有半身手手腳腳……手手用唔到，咁就要快……快啲搵救兵喇。」片中麥兜同麥太去求診，由校長扮演嘅醫生講解中風病徵時忽然病發，好彩佢哋即時發現，趕得切送醫生去急症室搶救。

下禮拜二（29日）係世界中風日，麥兜早排去完明愛醫院搞展覽，即日起至11月3日就轉去瑪嘉烈醫院H座地下，詳細講解中風種類、判斷中風先兆嘅「談笑用兵 」同「BEFAST」口訣，同埋急救方法。香港中風學會YouTube都有相關影片可以睇㗎！