【Emily】黃大仙周末搞市集 汕頭美食免費歎

【明報專訊】唔少港人鍾意趁周末北上消費，九龍東潮人聯會將由今個禮拜五（25日）起一連3日，喺黃大仙廣場舉辦「潮IN黃大仙」活動，市民到時可留港體驗下汕頭著名景點「汕頭小公園」，仲可以免費享用多款汕頭美食，例如內地人氣火鍋店「八合里牛肉」嘅牛丸、同埋香港日日香嘅鵝肉添！

重現「汕頭小公園」供打卡

「潮IN黃大仙」會有16個攤位，包括潮汕手打鴨屎香檸檬茶、惠來潮州魚蛋、潮州功夫茶（圖）等特色攤位，主辦方會喺現場派發換領券，市民可憑券換領食物。入場嘅人仲可以即場製作專屬自己嘅燈籠，以及同來自各地嘅非物質文化遺產傳承人互動，體驗剪紙、刺繡、木雕等技藝。活動期間仲會有青年歌手駐場獻唱流行同經典歌曲。

提到「汕頭小公園」，主辦單位特設8米高門拱，呈現小公園中心嘅中山紀念亭，畀市民「打卡」留念。九龍東潮人聯會常務副會長黃東周話，今次活動「落重本」，希望透過推廣家鄉文化，加強市民尤其青年對國家、家鄉嘅認識同歸屬感。