【Emily】公僕普通話賽題目放上網 畀公眾試答

【明報專訊】公務員事務局法定語文事務部之前舉辦普通話問答比賽，畀政府人員參加，最近局方揀選其中10條題目，畀公眾都測試吓自己嘅普通話知識。問題按時代大致分咗4個主題，其中「覺醒年代」講上世紀初嘅新文化運動，就陳獨秀相關刊物嘅文章提問。

問題之一係陳獨秀喺《青年雜誌》（《新青年》前身）發刊辭《敬告青年》中寫道：「青年如初春，如朝日，如百卉之萌動，如利刃之新發于硎……」要揀出文中「利刃」拼音相同嘅詞語，4個選項包括「歷任」、「履任」、「離人」或「儷人」。

另一較近代嘅問題提到，北京奧運係史上首座雙奧城市，其中「眾人拾柴__ __ __」嘅團隊精神係一大關鍵，意思係人多力量大，空出3個字嘅選項包括「火焰高」、「上火兒」、「火把節」或「火車頭」。

玩家每答一條問題，揀選答案後都會即刻有正確答案，可以知道自己嘅普通話程度。遊戲網頁連結會放喺局方嘅facebook專頁，為期一個月，至下月21日。