【Emily】東涌線海報設烏都印度旁遮普語版本

【明報專訊】《2024年施政報告》提出鼓勵的士車隊以阿拉伯語提供服務資訊，方便中東旅客，例如車廂告示、車隊網頁都用阿拉伯語解釋車隊運作同收費等，引起唔少討論，Emily發現，港鐵喺照顧外語人士需要方面似乎已經率先跑出。東涌線今個周六提早收車，港鐵前日喺網上發表宣傳海報解說安排，特別增設烏都語（Urdu）同印度旁遮普文（Punjabi）版。據了解，港鐵係留意到東涌有唔少少數族裔居住，故特別設多兩種外語版本。

翻查政府統計處2021年人口普查資料，離島約22%居民係少數族裔，比例上係全港18區中排名第三，最多係灣仔，有24%。

另外，港鐵噚日公布，為慶祝通車45周年，將撥500萬元獎學金，畀有志投身鐵路事業嘅本地學生申請，名額45個，明年1月接受申請，詳情稍後公布。其中25個名額會分配畀讀工程學或運輸物流相關學士學位課程嘅學生，另外20個名額會畀港鐵學院嘅文憑及高等文憑課程學員。獲選者最高可獲全額學費資助，港鐵亦會提供鐵路相關培訓。