【Emily】打針後開會好眼瞓 議員：好彩無瞌着

【明報專訊】天氣開始轉涼，衛生署上月開始季節性流感疫苗計劃，噚日趁立法會復會派外展隊去立法會，為議員打流感疫苗同新冠疫苗加強劑。有議員私下同Emily講，開會前打完針，結果開會時鬼咁眼瞓，問一問隔籬位，原來大家打完針都有「副作用」，仲講笑話好彩無「瞌着」，否則被影到開會瞓覺就唔好。

立法會主席梁君彥話，連同佢自己，噚日有50多個議員打疫苗，又話唔少議員已經年過50歲，屬高風險群組，除咗打流感針，佢都提醒，如有需要亦應該喺上一劑新冠疫苗或感染新冠病毒至少6個月後，再「補針」打加強針。

梁君彥引述衛生署數據，話2023/24年度流感疫苗接種率較上年度增加20%，創歷史新高，但6歲以下幼童接種率仍然偏低。