【Emily】銀海新星號首來港 美酒佳餚請客 兩日嚟3艘郵輪8000客 旅發局推觀光套票

【明報專訊】香港一直有唔少遊郵輪停泊，噚日起一連兩日就有3艘國際郵輪訪港，包括「珊瑚公主號Coral Princess」、「歌詩達莎倫娜號Costa Serena」同首次來港嘅「銀海新星號Silver Nova」，合共為香港帶嚟成8000名旅客。適逢呢幾日中環舉行緊「美酒佳餚巡禮」，噚日場內就舉行咗特別活動，款待約300名「銀海新星號」旅客，等佢哋體驗吓「美食之都」嘅魅力。

款待300人 聽交響樂教點心配酒

旅發局話，早喺近半年前促成銀海郵輪落實選址「香港美酒佳餚巡禮」，喺噚日為旗下「銀海新星號」約300名高增值休閒旅客舉辦岸上特色餐飲體驗，亦安排佢哋欣賞中國香港青年交響樂團嘅演出，同埋了解米芝蓮星級點心同中國葡萄酒嘅搭配學問。

旅發局提到，呢兩日訪港嘅郵輪旅客嚟自內地及超過30個國家及地區，佢哋同郵輪公司及本地旅遊業界合作，為郵輪旅客推出岸上觀光套票，包括乘搭天星小輪欣賞維多利亞美景等。

為推動香港郵輪旅遊發展，旅發局話一直全力爭取郵輪公司規劃航線時安排更多郵輪泊港，或選擇香港為新航點，今年全年有30家郵輪公司安排旗下郵輪訪港，共提供約150個航次。