【Emily】百年前北京風貌 港大博物館重現

【明報專訊】攝影可以將瞬間化作永恆，令後人透過影像重新想像一個城市嘅舊時面貌。著名攝影家和攝影記者漢茨．馮．佩克哈默（Heinz von Perckhammer，1895-1965）就用鏡頭記低1920年代嘅北京，佢嘅攝影集《北京》收錄咗200張照片，包括約百年前嘅紫禁城、雍和宮，仲有唔同嘅宗教建築、城市景象、街頭風貌同日常生活嘅相片。港大美術博物館下周起將辦展覽展示呢位攝影家嘅作品。

下月展至明年2月 免費入場

展覽名為「京城舊影：1920年代奧地利攝影家佩克哈默的攝影紀錄」，由下月1日至明年2月2日喺港大美術博物館馮平山樓1樓舉行，博物館喺禮拜二至六早上9點半至下晝6點、禮拜日下晝1點至6點開放，禮拜一、大學同公眾假期休息。展覽免費開放畀公眾，但因應港大最新遊客分流措施，參觀者要由馮平山樓地面入場。