【Emily】區議員關愛隊獲邀做「國安導師」

【明報專訊】《港區國安法》訂明，香港特區政府應通過學校、社會團體、媒體、網絡等展開國家安全教育，據Emily了解，各區民政事務專員近日發信畀各區區議員、三會、關愛隊等，邀請參與下月中舉行嘅「國家安全教育地區導師培訓計劃」，當日上午先上「國安課」，下午則出席活動嘅啟動禮。

政府發言人回覆話，特區政府計劃喺11月展開地區導師培訓，學員完成後會獲委任做地區導師，為期一年，向所屬地區、機構、團隊等宣傳及推廣國安信息。政府計劃下年培訓唔少於2600個地區導師，按每名導師一年內向唔少於30人傳遞國安信息，期望超過7.8萬人受惠。發言人又話，培訓課程由資深教育工作者授課，內容包括課堂互動學習同參觀國家安全展覽廳。

關愛隊成員嘆「加單」

有關愛隊成員私下話，過往從未收過民政事務總署要求做國安相關工作，亦唔包括喺之前按民政總署訂立嘅KPI（關鍵績效指標），對「加單」無奈。

身兼關愛隊長嘅中西區議員羅錦輝就話，無論係區議會或關愛隊身分，過往都係參與國安宣傳活動居多，例如出席講座、喺社區派單張等，關注若要關愛隊成員喺社區講解國安有難度。