【Emily】港僱員今年加薪3.5% 冠絕灣區

【明報專訊】打工仔嘅訴求不外乎加薪最重要，浸大噚日公布「2024粵港澳大灣區薪酬及福利調查」，顯示香港僱員今年平均加薪3.5%，連續兩年高過廣東省城市同澳門；而香港嘅大學本科畢業生平均入職薪酬係19,806元，亦都冠絕大灣區，高過澳門嘅14,996元同廣東省城市平均嘅5843元。

浸大1995年起開始調查香港、澳門同內地薪酬福利，今年調查喺7至9月邀請共280間機構參加，港、澳同廣東省城市機構分別有91、34同155間，涵蓋超過24萬個僱員，由機構提供上年7月到今年6月嘅薪酬資料。調查發現，香港僱員今年平均加薪3.5%，高過澳門嘅2.7%同廣東省城市嘅2.3%。浸大話，以往咁多年調查廣東省城市薪酬加幅一直高過香港，上年香港先第一次反超。

本科畢業人工5年升34%

調查亦發現，香港嘅大學本科畢業生平均入職薪酬較2019年升33.9%，其中生產、銷售、工程、人力資源和行政、市場拓展等職位都錄得35%以上升幅。浸大工商管理學院人力資源策略及發展研究中心主任黃旭認為，香港仍然係國際人才匯聚之地，即使面對經濟放緩挑戰，仍有較多企業願以高薪吸人才。