經濟
港人福田口岸叫外賣 試美團無人機服務
【明報專訊】香港《施政報告》提出發展低空經濟，其實內地都陸續應用於日常生活，香港市民都可以一試𠻹！美團（3690）宣布，旗下無人機福田口岸航線喺星期三（23日）正式開航，成為內地首條設於口岸區域嘅常態化無人機配送航線。
美團話，航線開通後，每日往返港深嘅市民喺口岸附近叫外賣或可享受「空投」服務，下單後最快10分鐘即可在指定降落點取貨。
集團又話，新航線支持香港手機號碼落單及取貨，亦與WeChat Pay HK合作，推出異地下單及港幣支付嘅新模式，即係香港市民北上或返香港前，可用美團App或無人機小程序提前下單，地址選擇「美團福田口岸前廣場無人機空投櫃」，到達福田口岸嗰陣即可前往智能空投櫃拎走商品。
美團補充，香港用戶下單時，可通過WeChat Pay HK支付，系統會自動將人民幣交易轉為港幣付款，毋須手動換匯。
