【Emily】博鰲青年論壇 江旻憓做講者 馬會有贊助 菁英會：江會員身分支持

【明報專訊】博鰲亞洲論壇與香港菁英會聯合舉辦嘅博鰲亞洲論壇青年論壇香港會議，因為疫情等原因停辦6年後，下月復辦，今次會議將有一場國際青年對話會，題目為「世界的未來：青年的視角」，星級講者包括本身係菁英會成員嘅奧運劍擊金牌得主江旻憓。江旻憓𠵱家喺馬會擔任對外事務助理經理，而馬會亦有贊助今次論壇，菁英會常務副主席黃進達話江旻憓係以會員身分支持活動，又話江都係青年代表人物，夠晒分量。

菁英會由一群參加過內地國家行政學院等機構培訓嘅人組成，現時會員超過1300個。今年復辦嘅青年論壇11月19日喺會展舉行，預料有過千人參加，特首李家超做開幕嘉賓。論壇圍繞3個主題，其中國際青年對話會除咗香港代表江旻憓，仲有新西蘭前總理希普利、泰國前副總理素拉傑、法國青年發展前副部長佩雷斯等。

菁英會主席林智彬話論壇特別選取兩個議題，分別係人工智能（AI）同氣候變化。佢話國家「十三五」及「十四五」規劃綱要都表明Al係國家重要發展戰略，香港亦定位國際創科中心，所以大家可探討點樣利用AI促進產業升級。論壇嘅圓桌會議由啱啱加盟理工大學嘅楊紅霞做主持，佢係內地知名AI科學家，曾喺阿里巴巴從事AI開發工作。