【Emily】入境處新總部啟用4月 762對新人註冊

【明報專訊】位於將軍澳嘅入境事務處新總部今年6月開幕，啟用4個多月已有762對新人喺呢度註冊，公務員事務局長楊何蓓茵同常任秘書長梁卓文噚日去參觀，仲見到新總部已放咗44部「申請個人證件服務站」及10部「領取個人證件服務站」，預計修訂相關法例後，最快今年底市民就可以透過全自助形式換領身分證，而且唔使預約。

上星期刊憲嘅《2024年人事登記（修訂）規例》周三（23日）提交立法會，作先訂立後審議程序。通過審議期後，入境處今年底將推行自助換證服務，市民透過入境處嘅「申請個人證件服務站」自行遞交身分證申請，就唔使親身面見登記主任。

楊何蓓茵等之後參觀24小時運作嘅「企業系統管理中心」，呢個中心負責監察所有出入境管制站運作，同時監察處方各電腦系統，以便有需要時迅速應變。