【Emily】港大明年辦低空科技碩士 料收100人

【明報專訊】《施政報告》話要發展「低空經濟」（一般指喺垂直高度1000米以下、根據需要延伸至不超過3000米嘅空域內，以無人機或有人駕駛航空器送貨載人等嘅經濟活動），港大噚日就宣布喺下學年開辦低空科技工程理學碩士，預計收100個學生，教授無人機技術創新、商業運營等專業知識；又同大灣區低空經濟聯盟簽訂協議，聯盟每年向港大推薦唔多過10個符合條件嘅學生攻讀。聯盟話希望培養具環球視野嘅專業低空技術人才，推動本地低空經濟發展。

港大話將會建立工業聯合實驗室，聘請資深從業工程師輔導學生同授課，又會開展一條試驗航線，積累低空運營嘅經驗。

港大機械工程系常務副主任黃立錫向Emily透露，課程計劃為期一年半，只限全職讀，着重技術範疇，期望「真係教到學生整部機出嚟」，不過佢話未打算設立獎學金吸引報讀，「𠵱家個market（市場）都好旺」，相信好多人會報讀，但就鼓勵為成績優秀嘅碩士生提供部分獎學金，繼續讀埋博士。