【Emily】日鰻老字號登港 擬短期開多兩間

【明報專訊】再有日本老牌食肆進軍香港市場。以「一本鰻」菜式聞名嘅鰻魚料理專門店「うなぎ四代目菊川」噚日喺銅鑼灣利園一期開業，負責日本店營運嘅Passion Geeks株式會社社長阿部翔悟話，計劃於短期內喺香港再開兩間門店，並想推出另一個更大眾化嘅鰻魚料理品牌。佢又話公司想全球推廣業務，香港提供咗平台實現目標，因此會選擇以香港作為東亞地區總部。

「うなぎ四代目菊川」創立於昭和七年（1932年），由超過90年歷史嘅鰻魚批發商直營，目前喺日本有20間店舖，喺台灣、韓國等亞洲地區有9間分店，當中位於名古屋嘅本店於2019年入選愛知縣米芝蓮指南。

該品牌首次進軍香港，主打梗係鰻魚。睇番餐牌，佢哋嘅招牌菜之一「名物一本鰻三吃」賣398元、「名物一本蒲燒定食」價錢385元。所謂「一本鰻」，做法係將原條肉厚嘅鰻魚，喺唔經蒸煮之下烤製，話鰻魚由店家所屬批發商挑選，會比一般鰻魚大一圈，標榜即使將魚皮烤得香脆都唔會縮身。店家又話進口鰻魚時會確保魚產保持活體狀態，運送時以專用嘅儲存設施「立場」存放，並用井水除泥，除掉鰻魚腥味。