【Emily】現身沙田 馬主紛集郵 費格遜愛駒跑第八

【明報專訊】沙田馬場噚日舉行浪琴香港國際賽，係政府話積極推廣賽馬旅遊後嘅首個國際賽，兩個馬場共有逾8萬名馬迷入場，馬會話當中內地客佔6511人，比去年同賽日增加四成。馬場噚日有唔少外賓及遊客，包括英超曼聯前領隊費格遜爵士。

兩馬場吸8萬人觀賽 內地客增四成

噚日嘅國際賽，4場一級賽總獎金高達1.26億元，吸引到世界唔同地區派馬來港參賽，其中全季獎金最高達4000萬元嘅香港盃，路程2000米，而全日高潮喺第八場上演，11隻馬中有7匹海外代表，英國馬「飛舞心靈」來頭不大，為51倍大冷，但馬主之中包括費格遜。費爵爺現身沙圈時甚受歡迎，唔少馬主爭相同佢合照，馬會行政總裁應家柏亦親自接待，可惜費爵爺愛駒最終名落孫山，只跑第八不獲獎金，但見佢神采飛揚，相信佢都好享受呢趟香港之旅。