【Emily】紡織中心設「開研」 種棉製衫一條龍

【明報專訊】大家想起衣服原材料之一嘅棉花，可能會諗到喺新疆嘅偌大棉花田，現時大家講求環保及科技，香港紡織及成衣研發中心有一項嶄新試驗，佢哋伙拍非牟利機構建立研發空間——開研，以垂直水耕種植棉花，並喺同一場地設一條龍製布、造衫生產線，希望能以呢種新穎模組化形式試驗可持續發展紡織工業。

水耕種植 慳水逾90%

「開研」於9月正式開幕，佔地兩萬平方呎，開研主要嘅突破包括種植技術。由於傳統棉花耕種耗水量甚大，開研採用垂直水耕，話可節省逾90%用水，而未被植物吸收嘅水分可循環再用。水耕能減少對土地嘅依賴，亦可提供可控環境，有利農作物連續生長和採收。研發中心話，水耕種植農場選址更可靠近城市，減少運輸過程產生嘅碳排放。

當棉花收成後，中心即場採集，然後經過開鬆、拼條等多個工序，製成紡織用紗線，最後利用機器製成衣服，試驗一條龍式種植及生產。