【Emily】政府伙建造業推STEAM教材 建測規園樣樣學

【明報專訊】學校搞「STEAM」（科學、科技、工程、藝術及數學）都有一段時間，發展局最近同教育局、建造業議會、政府工務部門、大專院校、建造業組織及專業學會推出新計劃，為中小學設計教材、提供教師培訓，從建築、測量、規劃、園境及工程等角度，連繫日常生活嘅實例、理論與實踐，豐富學生對STEAM嘅理解，第一套教材出年首季就會推出。

呢個計劃名為「STEAM UP想建理」，將按照教育局相關指引，設計一套創新而實用、以建造業為主題嘅中小學教學材料。項目為期30個月，教學材料將涵蓋建造業九大STEAM主題，包括樓宇建築、橋樑工程、機電工程、城市設計、地下世界、園境空間、道路設計與勘探測量、公屋設計、復古開新。計劃並會為教師提供培訓及教學資源，舉辦工作坊、實地考察及建造業專家分享會，透過建造業實例豐富學習成果。