【Emily】青年節利東街時裝騷 新舊織出港文化

【明報專訊】噚日灣仔利東街街頭上演咗一場時裝騷，名為「Vintage Remix—與經典再造時裝騷」，由融HUB主辦，係香港青年節活動之一。活動中，職業訓練局青年學院職專文憑（時裝）課程嘅師生合作設計24套經典時裝，當中將傳統文化融入現代設計，以創新方式呈現香港文化，並由專業模特兒同長者共同演繹。

除咗有師生設計服裝，另外有歌手T.MAX海淦清同星格流行音樂學院嘅學生，以跳唱形式演繹84歲裁縫當年設計同製作嘅經典服飾。VTC青年學院院長郭龍基話希望透過活動激勵時裝業界生力軍重視香港文化傳承同創新，包括今次有份參與嘅青年學院學生能以專業技能貢獻香港，及希望讓更多人了解香港時裝嘅發展軌迹，感受香港文化魅力。