【Emily】捧場《四徑》 葉劉倡Netflix有得睇

【明報專訊】本地紀錄片《香港四徑大步走》備受好評，截至噚日票房已破300萬元。新民黨主席葉劉淑儀亦同朋友去咗捧場，葉太噚日喺facebook表示，佢早前喺立法會前廳交流會，曾建議政府協助呢齣紀錄片喺Netflix等各地串流平台播放，畀更多人認識香港之美，說好香港故事。

讚該片說好香港故事

由Robin Lee導演嘅紀錄片講述山跑界嘅「香港四徑超級挑戰」，參賽者挑戰橫跨298公里嘅香港四大遠足徑，分別為麥理浩徑、衛奕信徑、港島徑同鳳凰徑，喺72小時內完成嘅會係生還者（Survivor），喺60小時內完成嘅就會獲得「完成者」（Finisher）稱號。葉太話對跑手羅啟邦印象較深刻，話即使佢賽前受傷、傷口受感染，仍然堅持參賽，最後以近62小時完成賽事。

葉劉淑儀又提及，參賽者途中似乎未遇上野豬、毒蛇或其他野生動物襲擊，並見到參賽者經過便利店或鄉郊小店補給，遇到嘅人非常友善，可見香港係個安全同友善嘅城市。