【Emily】工聯想搞模範職工評選 已同勞福局傾

【明報專訊】噚日大年初八，工聯會舉行新春團拜講今年工作重點，當中包括五一勞動節。工聯會透露，今年會繼續邀請主要官員落區慰問前線勞工，弘揚勞動精神，又話已經同勞福局商量，參考內地舉辦模範職工評選。被問到停咗5年嘅五一遊行會唔會復辦，會長吳秋北就冇答實，話「只要手段啱嘅就會嘗試」。

復辦五一遊行否

吳秋北：手段啱就會試

吳秋北話工會重視五一精神，打工仔要有合理待遇，為咗表達訴求，工會「從來冇放棄任何好手段」，所以「冇所謂復唔復辦（遊行），只要手段啱嘅、好嘅，我哋就會嘗試」。佢又提到工會將全面參與各項架構包括三會、關愛隊等。咁係咪代表立法會換屆會加派人手參選？佢就話言之尚早，但「態度積極」。

工聯會去年會員人數超過43萬，工聯會話日後會繼續關注各項議題，包括5月1日起落實嘅強積金取消對冲，會搞至少4場大型地區講解；適逢省港大罷工100周年，將加強愛國主義教育，畀市民認識國家工運嘅先驅。該會亦希望政府盡快落實為基層僱員代供強積金。