【Emily】李家超訪哈爾濱 盼為發展旅業取經

【明報專訊】特首李家超噚日去到黑龍江展開訪問行程，當地冬天冰天雪地，但反而造就旅遊業發展。李家超噚日抵達哈爾濱，話佢好重視香港旅遊業發展，已經成立由政務司副司長卓永興領導嘅「發展旅遊熱點工作組」，發掘同建設新嘅地區旅遊熱點。佢話自己由「東方之珠」去到「北國冰城」，期望呢次行程能為香港旅遊業發展帶來更多創新思維同靈感。

李家超同太太林麗嬋噚日飛抵哈爾濱，黑龍江省副省長余建等人迎接。李家超話今次訪問哈爾濱6日，主要係參加第九屆亞洲冬季運動會開幕禮，仲會睇埋部分賽事，為國家隊同香港隊打氣。佢話自己亦計劃了解哈爾濱嘅旅遊業發展，包括「冰城」成功打造為「全國最佳旅遊目的地」嘅經驗，文體旅局長羅淑佩及特首辦主任葉文娟都會隨行。