【Emily】Art Central推介靉嘔等6藝術家

【明報專訊】藝術展覽盛事「Art Central」下月底舉行，為慶祝第十屆，主辦單位話今年有新亮點，其中一項係特設推介畫廊專題「Legend」，會介紹6個喺1970年前出生嘅亞太區藝術家，包括日本代表靉嘔，同埋香港代表、以影像同媒體藝術聞名嘅馮美華。

Art Central喺3月26日至30日回歸中環海濱場地，門票現已公開發售，提前預訂有優惠，首輪門票185及220元。活動獲政府文化藝術盛事基金資助。主辦單位話今年有來自全球超過100間畫廊同500名藝術家嘅作品展出。

主辦單位噚日公布活動詳情，亮點之一嘅專題「Legend」會推介6個前輩級藝術家嘅作品，分別係日來「激浪藝術」核心人物畫家靉嘔、以前衛超現實影像聞名嘅日本攝影師細江英公、澳洲藝術家Emily Kam Kngwarray、韓國嘅李仁燮、台灣嘅梅丁衍，同埋香港嘅馮美華。

展覽另一亮點係聚焦攝影作品，焦點包括中國藝術家付羽、旅居荷蘭嘅台灣藝術家羅晟文、台灣導演編劇暨電影攝影師鍾孟宏等人嘅作品。