【Emily】大學派團戰渣馬 蔡若蓮「大躍進」

【明報專訊】噚日渣馬跑手眾多，學界都派咗代表出戰。教育局長蔡若蓮話噚日完成人生第二次半馬，以兩小時40分鐘完成挑戰，成績進步唔少。

港大醫學院浸大中醫學院出力

各間大學都傾力支持盛事，港大醫學院師生組團參賽，有學院啦啦隊為健兒打氣，跑步第25年嘅院長劉澤星完成半馬，佢感謝師生參賽，話賽事促進學院團結一心。城市大學HK Tech 300計劃派10個初創企業代表出戰，並向健兒派運動毛巾，祝賀隊員攞到滿意成績。城大高級副校長（創新及企業）楊夢甦就參加10公里賽。

教育大學跑手隊都有參賽，副校長方永豪跑咗10公里，教大並喺銅鑼灣運動場擺攤位為跑手「集氣」。浸會大學今次有超過600名教職員、學生、校友和友好組成嘅隊伍參加各級賽事。浸大亦喺銅鑼灣運動場設攤位，由中醫藥學院多名醫師同學生組成團隊，為浸大跑手提供劇烈運動後恢復嘅建議。

恒生大學今年成立HSUHK Team參與，有近150名學生、教職員及校友參與各級賽事，參與人數破歷年紀錄。