【Emily】訪哈爾濱 李家超撐亞冬會港隊

【明報專訊】特首李家超上周四（6日）率團到訪哈爾濱，噚日中午會見國家體育總局長高志丹，傍晚佢同太太林麗嬋到場欣賞2025年第9屆亞洲冬季運動會（亞冬會）賽事，為港隊代表打氣。

李家超、文化體育及旅遊局長羅淑佩、中國香港體育協會暨奧林匹克委員會代表喺噚日中午會見高志丹。李家超話，內地有豐富嘅冰雪資源，特區政府會推動香港同內地冬季運動嘅交流合作，亦提到會同廣東省政府、澳門政府合力籌辦簡約、安全、精彩嘅第15屆全國運動會。全運會將於今年11月舉行。

到傍晚，李家超夫婦到場觀看冰壺賽事，羅淑佩亦有同行。李家超喺facebook發帖話現場氣氛熱烈，國家隊同港隊運動員都展現出拼搏嘅體育精神，令人動容。佢提到今次係香港冰壺隊首次登上國際綜合運動會嘅舞台，意義非凡，期待佢哋繼續進步，喺國際舞台上再創佳績。

另外，特首一行人亦先後參觀雪雕藝術博覽會太陽島雪博會同冰雪主題樂園哈爾濱冰雪大世界，了解兩個園區嘅營運情况同發展。李家超今日（10日）會同黑龍江省領導會面，明日返港。