【Emily】一半行山客感缺飲水站 團體倡效日本山屋 山徑建中途站

【明報專訊】紀錄片《香港四徑大步走》上映後，令唔少人更關注山徑活動。慈善機構「青途」噚日公布一項調查發現，50.1%受訪行山者認為香港目前山徑設施缺少飲水站，31.7%受訪者就話人流太多影響行山體驗。有較多受訪者話山徑有太多石屎梯級，洗手間不足及洗手間衛生情况惡劣，熱門山徑垃圾太多。

「青途」喺1月28號至2月7號喺網上問卷了解行山者、山徑賽參與者、越野跑跑手對山徑設施嘅期望，以及推廣山徑旅遊嘅睇法，共收集到385份有效問卷。結果顯示，50.7%受訪者首選麥理浩徑為最具潛力成為國際旅遊景點；其次係鳳凰徑，有21.7%受訪者支持。

「青途」主席兼民建聯立法會議員鄭泳舜喺記者會上話，佢哋提倡為山徑分級，例如為初學者同熱愛冒險者分別提供優質山徑及原始路徑。佢亦建議可參考日本「山屋」，喺主打旅遊嘅山徑興建具驛站、茶館等功能嘅中途休息站，或升級現有郊野公園嘅遊客中心。