【Emily】熊貓八達通今起預訂 售108元

【明報專訊】海洋公園一對港產大熊貓家姐、細佬即將喺星期日（16日）正式亮相，園方將聯同八達通卡有限公司合作推出「海洋公園大熊貓珍藏版八達通」，成人版同小童版兩款都印有6隻大熊貓嘅全家福。

「海洋公園大熊貓珍藏版八達通」每張售價108元，不設按金同儲值額。八達通銀包客戶可以喺今早10點起至本月24日下晝5點，經八達通App優先預訂；海洋公園禮品店亦會喺4月底起公開發售。

另外，海洋公園入場者由噚日起至明年3月17日，可到園內香港賽馬會四川奇珍館，免費下載大熊貓安安、可可嘅動畫手機八達通卡面。佢哋亦可以喺星期六（15日）至5月14日期間，到「大熊貓之旅」免費下載大熊貓樂樂、盈盈，以及家姐、細佬嘅動畫手機八達通卡面。