【明報專訊】喺剛過嘅農曆新年假期，實政圓桌立法會議員田北辰有件難忘樂事。佢話喺2月8日，晨早同朋友去深圳西麗打高爾夫球，話前一晚飲宴飲咗茅台，而自己酒量屬「有限公司」，翌晨個人仲有少少未醒，但估唔到打起波嚟表現仲好，做出人生首次嘅「一桿入洞」。田二少話佢活咗四分之三世紀、打咗50年波，都係首嘗一桿入洞嘅喜悅。
田二少話，當日其實諗住「hea打」，當時打緊A場第8個洞，距離洞位大約135碼，佢揀咗支8號鐵桿，揮桿一刻已感覺非常良好，見到個波以一條超靚嘅拋物線直飛向旗桿位，個波落地後慢慢入洞。田二少形容喺呢個年紀有咁嘅運氣，感到人生好滿足及精彩。
