【Emily】體育園開幕禮 4台9點半聯播

【明報專訊】喺2019年首季動工嘅啟德體育園3月1日正式啟用，噚日以署理特首身分見記者嘅陳國基話，當晚6時半會喺主場館舉辦「盛大而隆重」嘅開幕典禮，全長約一個半鐘，陳國基話，本地4個免費電視台會喺當晚9點半聯播，即意味市民冇直播睇。

陳國基：嘉賓跨年齡跨世代

政府噚日暫未公布開幕禮嘅播放安排，但如果開幕禮係延後播放，而主場館可坐5萬現場觀眾及傳媒，會唔會電視未播，大家手機已睇到？至於屆時有咩精彩內容，陳國基噚日透露出席嘅嘉賓「跨年齡、跨世代」，包括來自本地同內地嘅體育和文娛界代表。

陳國基噚日出席行政會議前見傳媒時話，開幕禮會由具故事同主題嘅不同演出環節組成，演繹啟德嘅歷史同蛻變，包括大型舞蹈、體育、表演、歌唱演出等，貫穿「百川匯海」、「承先啟後」、「力爭上游」和「百花齊放」4個主題。佢提到，舞台設計、場館出入同座位安排等工作正密鑼緊鼓進行，畀全球朋友可以喺現場、電視或網上免費欣賞；央視亦會於當晚稍後時間喺內地媒體平台播放節目，詳情稍後公布。

陳國基話，佢同全港市民都對新主場館充滿期待同信心，政府會好好把握機遇，令體育園成為香港新地標。