【Emily】深圳口岸元宵派湯 陳月明籲港借鏡

【明報專訊】剛過去嘅禮拜三係元宵節，選委界立法會議員陳月明噚日喺facebook專頁上載咗「深圳市口岸志願者服務隊」喺深圳蓮塘口岸派湯水嘅相片，顯示約10個過境旅客排隊攞湯水，而服務隊攤位背後嘅熒幕就展示「來深過大年，圳（普通話諧音「正」）好遇見你」標語。佢話覺得呢個舉動「暖身又暖心」，提醒咗佢諗下香港呢邊喺咪都可以做多一啲呢！

陳月明同Emily講，上載嘅照片係轉載「鄉親」過關時拍攝嘅情况，令佢諗起香港呢邊嘅香園圍口岸喺前年開通客運時，當局亦安排咗同文化及旅遊相關嘅宣傳產品，向來港嘅訪客推介。佢提到日本等熱門旅遊地點，旅客入境時亦會獲派優惠券，又或者有職員講解點樣使用與消費相關嘅服務。

隨住深圳放寬當地居民來港「一簽多行」，陳月明認為香港可以學下內地，動員公務員義工隊或者地區力量，喺各個環節配合下，多花心思推動「無處不旅遊」。