【Emily】旅發局跑步旅遊吸韓客 女星運動員有份

【明報專訊】山跑電影《香港四徑大步走》大賣，再掀本港跑山及跑步熱潮。繼舊年首次舉辦，旅發局喺過去周末一連兩日（15、16日）再舉辦Hong Kong Outdoor Festival，吸引超過140個熱愛運動嘅韓國旅客來港，征戰石澳龍脊等跑步路線，影視串流平台Netflix熱播韓劇《政壇旋風》嘅女演員林世美仲係其中一個跑手𠻹！

旅發局針對韓國市場喜好，跟網上旅遊預訂平台Klook、航空公司等業界合辦上述活動，逾140個韓國旅客可選擇晨跑太平山頂、夜跑中環海濱，亦可喺石澳龍脊越野跑。林世美、韓國現代五項運動員兼亞運金牌得主全雄太等藝人及運動員，除咗跑勻3條路線，仲趁機遊覽香港，包括去星光大道同李小龍銅像打卡、搭天星小輪過海。

策劃活動嘅旅發局韓國總監金潤豪話，韓國嘅千禧世代同Z世代近年愈嚟愈重視健康，鍾意戶外活動，日後會繼續結合健康運動及本地自然景點，進一步推廣香港戶外體驗。