【Emily】中大超級數學院招生 幾百人報名 港生較少

【明報專訊】中大今個月初喺春茗宣布成立8年制嘅「致真交叉數學科學院」課程，設40個學額，預料會取錄「數學神童」。中大署理常務副校長潘偉賢噚日出席立法會小組委員會會議後同Emily傾開，話短短幾星期宣傳之下，中大已收到幾百人報讀學院，今個周末數學系要「全員出動」面試。

潘教授話，中大喺上海、北京、深圳及香港分別設考場，評核唔同地方嘅申請人，當中香港相對少人報名，與學院院長兼知名數學家丘成桐所預計嘅情况一致。

潘又話，中大喺小紅書等多個途徑宣傳學院，短短幾星期吸引幾百人報讀，校方都覺得反應熱烈。但佢話中大唔會因為報讀人數多而隨意放寬學額，「我哋要嘅係高質量，要睇佢（申請人）考試考唔考得過去，考唔過就唔收」。