【Emily】公共設施冠名權 李浩然倡公開賣

【明報專訊】政府要節流減輕財赤，同時收到唔少開源嘅建議，其中華潤集團粵港澳大灣區首席戰略官、選委界立法會議員李浩然建議政府研究開放公共設施嘅冠名權，增加收入來源，而政府就負責對參與冠名嘅機構同個人做好把關。佢舉例，梁顯利油麻地社區中心當年由梁顯利家族出資800萬元承擔三分之二建築費，喺1980年代落成。

稅收方面，李浩然贊成秉持「能者多付」原則，認為可上調物業稅，由𠵱家15%加到16%或17%，分別可增加近7%及13%收入，同時可增加博彩稅率、車輛首次登記稅按累進稅率訂立加幅等。

至於公務員係咪要凍薪或減薪，李浩然認同短期應凍結編制同凍薪，兼且凍結「跳point」自動增薪；中期而言，政府應減少設立同延長有時限職位，改為內部調配人手。